Vinje kommune inngår avtale om nye omsorgsbustader
– Vi er svært glade for å ha kome fram til ein avtale med Vinje kommune. Målet er å gje eldre innbyggjarar og personar med omsorgsbehov eit moderne butilbod som legg til rette for tryggleik, sjølvstende og nærleik til tenester, seier direktør for omsorgsbustader i Allstad, Per Magnus Haugen Presthammer.
Etter planen går spaden i jorda for prosjektet i løpet av neste år, og omsorgsbustadene er venta å stå ferdige mot slutten av 2028.
– Vinje står, som mange andre kommunar, overfor eit aukande behov for helse- og omsorgstenester i åra som kjem. Ved å samle omsorgsbustader og sentrale omsorgstenester på Rauland, får vi eit meir framtidsretta tilbod der tenestene kjem tettare på fleire innbyggjarar. Det gjer det lettare å bruke ressursane godt og gjev helsepersonellet meir tid til menneske og mindre tid på vegen, seier Jon Rikard Kleven, ordførar i Vinje.
Kommunen har valt å leige omsorgsbustadprosjektet
Løysinga som Vinje kommune har valt, inneber at eigedomsfondet Samfond, med KLP som hovudinvestor, kjøper prosjektet av Allstad. Vidare skal Vinje kommune leige omsorgsbustadene gjennom ein langsiktig avtale med Samfond.
Leigemodellen gjev kommunen tilgang til nye omsorgsbustader utan å måtte stå som eigar av bygningane. Allstad opplever stor interesse for leigealternativet med Samfond.
– Modellen gir kommunen tilgang til å inngå ein langsiktig, føreseieleg og fleksibel leigeavtale for omsorgsbustadene. Fleire kommunar har fått augo opp for denne moglegheita, som eit alternativ til å auke gjeldsopptaket og bere risikoen ved store einskildinvesteringar. Vi opplever aukande interesse frå kommunar over heile landet for leigemodellen vår, seier Helge Haaland i Samfond.
Møter eit behov
I haust gjennomførte Vinje kommune ein innbyggjardag og ei spørjeundersøking blant innbyggjarar over 50 år. Undersøkinga viste at fleire kjenner på utfordringar knytte til trapper, vedlikehald og avstand til tenester der dei but i dag. Over halvparten svara at dei på sikt ønskjer å flytte til ein mindre bustad, leilegheit eller bustad med fellesareal.
– Vi ser at interessa er stor for framtidsretta bustader som er enklare å bu i. Prosjektet svarar godt på desse behova, og vi ser fram til å realisere omsorgsbustadprosjektet i Vinje, seier Kleven.
Frå venstre: Helene Jordheim, eigedomsutviklar i Allstad, Therese Bjørseth, prosjektleiar i Allstad, Kjetil Midtgarden Vaagen, kommunalsjef for teknisk drift og infrastruktur, Jan Myrekrok, kommunedirektør, Jon Rikard Kleven, ordførar, Kari Dalen, kommunalsjef for helse og meistring i Vinje kommune, og Per Magnus Haugen Presthammer, direktør for omsorgsbustader i Allstad.
Slik fungerer leige av Allstads omsorgsbustader gjennom Samfond
- Samfond kjøper prosjektet av Allstad og leiger ut til kommunen.
- Langsiktige og trygge leigeavtalar dannar grunnlaget for leigenivået.
- Investeringstilskot frå Husbanken reduserer leigesummen.
- Dersom ein person ikkje lenger skal bu i ein omsorgsbustad, har kommunen tildelingsrett til ny leigetakar.
- Samfond er Noregs første ubelånte fond for sosial infrastruktur, initiert av investorar med eit sterkt ønskje om å bidra til berekraftige investeringar i norske kommunar. KLP er hovudinvestor.
Les meir på allstad.no/samfond